Laag Na Pud: Dalaguete

Adtong Friday, human sa among choir practice, nakalaag na pod ko ug layo. Kauban sa iyang Mama ug mga igsoon, ang usa sa akong mga amigo namalayi (or namalay, dili ko sure sa term) sa akong amiga (nga taga Dalaguete) nga kauban ra sad nako sa choir. Syempre kay uban man pod ang akong mga close nga friendships sa church pag-adto, magpauwahi ba gud ko? Kuyog-baboy (dili pa tanto) jud ko!

Sayo unta mi mogikan, pero kay naghinuwatay pa man sa mga dugayan (you know na, Filipino time) medyo init na paggikan namo. Pero ok lang kay dili man traffic (Byernes santo man gud to) so paspas ra amo dagan. Lingaw ayo ko sa sakyanan kay mga jokers man gud akong mga kauban, sige ra ko'g tingsi (murag tala-tala), maayo gani wa ko panuhota. Dili parehas sa akong usa ka kauban nga dili lang ko magsaba kinsa.

Pag-abot namo sa Dalaguete town proper, wala pa mi midiretso sa among tuyo (Brgy. Langkas) kay naa pa mi gihuwat nga kauban nga nagmotor kay nasaag. Nausa ba nga naabot na man nuon siya ug Mantalongon, Barili nga Mantalongon, Dalaguete ra man unta mi (nagpataka man gud ug liko). Sa dihang nakabalik na siya sa iyang agi ug naabot na sa among giparkingan, nagpadayon na mi sa among byahe. THIS IS IT na jud!

Mao diay nga "this is it" kay pirti ka sagkahon, batsihon, bakilid, ug piot ang dalan padulong Brgy. Langkas nga moagi pa sa Brgy. Mantalongon. Pero in fairness nice kaayo ang climate. Bugnaw kaayo nga feeling nako naa ko sa Baguio. Nice pod kaayo ang view sa mountains, valleys, and farms, as in, nature at it's best jud. Pero mao lagi pod, untad kaayo ug makahunahuna ka kung makabalik pa ba ka in one piece sa syudad.

Pag-abot namo nakaingon jud mi ug "Hahaaaaaaay" pagkahuman sa "Hagoooooooooy". Naa lang koy nabantayan sa mga tao ngadto...ang ilang kilometro kay murag mas mubo kaysa sa kilometro nga atong naandan kay kung moingon sila nga "naa ra sa unhan", pirti pa man diay'ng layua!!! Hinuon, wa pod ko kabantay kung kamot o simod pa ang gitudlo adto. Maayo na lang kay present ang usa sa mga highlight sa unsa mang laag, ang KAON. Hehe. Lami kaayo ang among kaon nga humba ug kinilaw. Human sa kaon, samtang nagsabotsabot sila (kay namalayi lagi), ang uban nga way labot kay nagvideoke. Bibo kaayo noh! Ambot lang kung nakasinabot ba kaha to sila sa among kabanha. Pero nagkasinabot tingali kay wa may mga sundang nga nanggawas. Naglagot pa jud ko sa akong kauban kay giilad ko. Ingon sila naa daw "falls" ngadto sa "unhan". Adto pod tawn mi sa kauban nakong nailad pod. It turns out, ang "falls" nga ilang giingon kay pasong diay nga medyo layo-layo (wa na pod ko kabantay nga simod man diay ang gitudto adto). Ok na lang, at least nakalakawlakaw ngadto.

Pagpauli namo mihapit mi sa Mantalongon Public Market nga naa ngadto ang pinakabaratong mga utanon. Utanon Capital of Cebu man daw ngadto. Naa man gani zip line sa mountains for the veggies (nindot unta kung naa sad sa tao). Fresh ug barato jud ang utanon ngadto. Mihapit pod mi sa Obong Spring Resort nga naa pod sa "unhan". Nice jud pod kaayo ang spring nga sumpay sa dagat...haskang tugnawa lang pod. Tugsaw pod dayon ming mga babae. Gi-time-an mi sa mga laki kay dili daw mi magdugay kay manguli na. Ug pirti na pod namong lagota kay nagdalidali pa mi'g panghaw-as ug change to dry clothes kay basin mabiyaan mi, nya paghuman namo'g ilis kay sila na pod diay ang nagswimming. Hmp! Dugay pa jud sila nanghaw-as. Wala na lang mi mibalik ug langoy-langoy kay kapoy na ilis ug balik.

Pagpanguli namo kay medyo ngitngit na ug naka-realize mi nga gutom na man pod diay. Mao to nga nanghapit mi sa Argao ug barbecue ug puso sa daplin sa dalan. Nagdugaydugay pa mi kay basin makaabot pa mi sa mga prusisyon sa Carcar, Tabunok, ug Pardo, matanggong ra mi. Nakauli ko sa balay mga 9:30pm na ug pirti nang kapoya pero naka-post pa japon sa Facebook ug pictures. Hehehe...adik!

Mao to ang usa sa akong pagpahimulos sa gamay nga bakasyon. Kay sunod semana busy na pod kunuhay ang akong life. Hahay! Gusto pa ko mulaag...